0. ped nām ī dādār Ohrmazd ud murvāg jahišn ī nēk, tandrustīh ud dagrzīvišnīh harv vehān ud frārōnkunišnān, nāmcišt ōy kē rāy nibēsīhed.
1. ēn ayādgār ī Zarērān xvānend, ped hān gāh nibišt ka Vištāsp šāh abāg pusarān ud brādarān <ud> *vāspuhragān ud *hāmhirzān ī xvēš ēn dēn ī abēzag ī māzdesnān az Ohrmazd pedīrift.
2. ud pas Arzāsp <ī> hyōnān xvadāy azd mad kū, Vištāsp šāh abāg *pusarān <ud> brādarān ud vāspuhragān ud hāmhirzān ī xvēš ēn dēn ī abēzag <ī> māzdesnān az Ohrmazd pedīrift.
3. ēg-išān grān dušxvārīh *būd.
4. u-šān Vīdrafš ī jādūg ud Nāmxvāst ī Hazārān abāg do bēvar spāh ī vizīdag ped byaspānīh ō Ērān-šahr frestīd.
5. ud pas Jāmāsp ī *pasānīgān-sālār zūd andarōn andar šud, u-š ō Vištāsp šāh guft kū: “az Arzāsp ī hyōnān xvadāy do frēstag āyend, kē andar hamāg šahr ī hyōnān az avēšān huzihrdar nēst.
6. ēk Vīdrafš <ī> jādūg, ud didīgar Nāmxvāst ī Hazārān, abāg do bēvar spāh ī vizīdag, ud fravardag ped dast dārend ud gōbend kū: “-mān andar ō pēš ī Vištāsp šāh hiled!”
7. Vištāsp šāh guft kū: “-šān andar ō pēš hiled.”
8. ud andar šud hend, ud ō Vištāsp šāh namāz burd, ud fravardag bē dād.
9. *Abarsām ī dibīrān mahist abar pāy ēstād ud fravardag ped buland xvānd.
10. ud abar fravardag ēdōn nibišt ēstād kū: “-m ašnūd kū ašmā bayān ēn dēn <ī> abēzag ī māzdesnān az Ohrmazd pedīrift, ud agar nē hān *hiled, *ēg amā grān zyān ud dušxvārīh aziš šāyed būdan.
11. bē agar ašmā bayān sahed, ēn dēn ī abēzag hiled <ud> abāg amā hamkēš baved, ēg-itān ped xvadāyīh peristem, ēg-itān dahem sāl ped sāl vas zarr <ud> vas *asēmēn ud vas asp <ī> nēk ud vas *dāšn <ī> šahriyārīh.
12. ud agar ēn dēn bē nē hiled, ud abāg amā hamkēš nē baved, ēg-itān abar rasem, xvēd xvarem ud hušk sōzem, ud cahārbāy ud dobāy az šahr vardag kunem, u-tān ped *bannagīh *ud grān dušxvārīh kār framāyem.”
13. pas Vištāsp šāh ka-šān hān soxan ašnūd, grān dušxvārīh būd.
14. ud pas hān tahmag spāhbed ī nēv Zarēr ceōn-š dīd kū Vištāsp šāh višēg būd, zūd andarōn andar šud.
15. u-š ō Vištāsp šāh guft kū: “agar ašmā bayān sahed, an ēn fravardag pesox framāyem kirdan.”
16. Vištāsp šāh framān dād kū: “fravardag pesox kun!”
17. ud hān tahm spāhbed ī nēv Zarēr fravardag pesox aōn framūd kirdan kū:
“az Vištāsp šāh ī ērān dahyubed ō Arzāsp ī hyōnān šāh, drūd!
18. ped fradumīh, nē amā ēn dēn <ī> abēzag hilem ud abāg ašmā hamkēš nē bavem, ud amā ēn dēn <ī> abēzag az Ohrmazd pedīrift ud bē nē hilem, ud bē ašmā didīgar māh anōš xvārem.
19. ānōh ped Arus Razūr ud *marv ī Zarduštān, kē nē kōf burz ud nē *dar zufr, bē ped hān dašt ī hāmōn aspān tag pēgān vizārišn.
20. ašmā az ānōh āyed dā amā az ēdar āyem, ud ašmā amā vēned <ud> amā ašmā vēnem.
21. u-tān nimāyem kū ceōn zad bavād dēv az dast <ī> yazdān.”
22. *Abarsām ī dibīrān mahist fravardag bē āvišt, ud Vīdrafš <ī> jādūg ud Nāmxvāst ī Hazārān fravardag bē pedīrift, ud ō Vištāsp šāh namāz burd <ud> bē raft hend.
23. ud pas Vištāsp šāh ō Zarēr ī brād framān dād kū: “ped garān bašn [kōfē burz] ātaš framāy kirdan!
24. šahr azd kun ud byaspān azd kun kū, bē muvmard —kē āb ud ātaš ī vahrām yazend ud pahrēzend— enyā az dah-sāl dā aštād-sālag, ēc mard ped xānag ī xvēš bē mā pāyed!
25. ēdōn kuned kū, didīgar māh ō dar ī Vištāsp šāh āyed, ud agar nē, ka āyed <ud> hān dār abāg xvēštan bē nē āvared, ānōh ped dār abar framāyem kirdan!”
26. pas harv mardōm az byaspān azd mad, ō dar ī Vištāsp šāh āmad hend ped *hamspāhīh, ud tumbag *zanend ud nāy pazdend ud gāvdumb vāng kunend.
27. u-š kāravān ēvarz kunend ud pīlbān ped pīl ravend ud stōrbān ped stōr ravend ud vardyōndār ped vardyōn *šavend.
28. vas ēsted šafrag ī Rustahm, vas kantigr ī pur-tigr ud vas zreh ī rōšn ud vas zreh ī cahārgard.
29. ud kāravān ī Ērān-šahr ēdōn bē ēstend *kū vāng bē ō asmān šaved, ud petān bē ō dušox šaved.
30. ped rāh kū šavend vidarg ēdōn bē brīnend, rōd-*iz āb bē *šēbēnend ī dā ē māh, āb xvārdan nē šāyed,
31. dā panzāh rōz, rōšn nē baved, murv-iz nišēm nē *vinded bē ka ō aspān bašn, nēzagān tēx, ayāb ō kōfē sar burz nišīyend, az gard ud dūd šab ud rōz nē pēdāg.
32. pas Vištāsp šāh ō Zarēr ī brād framān dād kū: “*viyān kun! dā ērān-z *viyān kunend, dā amāh-iz bē dānem kū šab ast ayāb rōz.”
33. pas Zarēr az vardyōn bērōn bē āmad ud *viyān kird, ud ērān *viyān kird, ud gard <ud> dūd bē nišast, star ud māh ped asmān pēdāg būd.
34. pas zanend sisad mēx ī āhenēn ī pediš bannend sisad *arvēs, kē harv *arvēs sisad drāy ī zarrēn pediš āgust ēsted.
35. pas Vištāsp <šāh> ō kay-gāh nišīyed, ud Jāmāsp <ī> bidaxš ō pēš xvāhed <ud> gōbed kū: “an dānem kū tū Jāmāsp dānāg ud vēnāg <ud> šnāsag *hē.
36. ēn-z *dānē kū, ka dah rōz vārān āyed, cand srešk ō zamīg āyed, ud cand srešk abar srešk āyed.
37. ud ēn-z dānē kū, <ka> urvarān viškōbed, kadām hān gul ī rōz viškōbed, ud kadām hān ī šab, <ud> kadām hān ī fradāg.
38. ēn-z dānē kū midrag kadām hān āb dāred ud kadām hān nē dāred.
39. ēn-z dānē kū fradāg rōz cē baved andar hān azdahāg razm ī Vištāspān, <ud> az pusarān ud brādarān ī man kay Vištāsp šāh kē zīved ud kē mīred.”
40. gōbed Jāmāsp <ī> bidaxš kū: “kāc ka an az mādar nē zād hēm, ayāb ka zād hēm ped xvēš baxt ped rahīgīh bē murd hē, ayāb murv-ē būd hē ō drayāb ōbast hē, ayāb ašmā bayān ēn frašn az man nē pursīd hē, bē ka-tān pursīd, ēg-um nē *kāmist bē ka rāst gōbēm.
41. agar ašmā bayān sahed, *uzvān ī xvēš *gravān bared, ped xvarrah ī Ohrmazd bay, dēn ī māzdesnān ud gyān <ī> Zarēr ī brād sōgand xvared [kū: *šamšēr ī pōlāvadēn ud *šēd-tēx ērvār dā ō *sad-u-aštād-u-sē bār bē māl] kū: ‘-t nē zanam ud nē ōzanam ud nē-z ped dēbahr dāram’ dā gōbed kū cē baved andar hān razm ī Vištāspān.”
42. pas gōbed Vištāsp šāh kū: “ped xvarrah ī Ohrmazd ud dēn ī māzdesnān ud gyān <ī> Zarēr <ī> brād sōgand *xvaram kū-t nē zanam ud nē ōzanam ud nē-z ped dēbahr dāram.”
43. pas gōbed Jāmāsp <ī> bidaxš kū: “agar ašmā bayān sahed, ēn vazurg spāh <ī> Ērān-šahr az mašk ī pādixšāy ēv tigriyāb frāzdar framāyed nišāstan.”
44. pas Vištāsp šāh hān vazurg spāh <ī> Ērān-šahr az *maškabarzēn ī Vištāspān ēv tigriyāb frāzdar framāyed nišast.
45. pas gōbed Jāmāsp ī bidaxš kū: “ōy veh kē az mādar nē zād, ayāb ka zād murd, ayāb az arasīh ō peymān nē mad.
46. fradāg rōz ka *pehikafend, nēv ped nēv ud varāz ped varāz, vas mād *abēpuhr, vas <puhr> abēpid, ud vas pid abēpuhr, ud vas brād abēbrād, ud vas zan <ī> šūyumand abēšūy bavend.
47. vas āyend bārag <ī> ērānagān kē višād <ud> arvand ravend andar xūn, xvadāy xvāhend ud nē vindend.
48. ōy veh kē nē vēned hān Vīdrafš <ī> jādūg *kē āyed ud razm *yōzed ud vināh kuned ud ōzaned tahm spāhbed Zarēr ī tō brād, u-š bārag bē barend, hān syāh-āhenēn-sumb Zarēr bārag; ud ōy Nāmxvāst ī Hazārān kē āyed ud razm *yōzed ud vināh kuned <ud> ōzaned hān Pādusrū ī ardāy <ī> māzdesnān ī tō brād, u-š bārag-iz bē barend; hān *zanān darīgbed, ōy Nāmxvāst ī Hazārān, kē āyed ud razm *yōzed ud vināh kuned, ud ōzaned hān Frašāvard ī tō pus ī dā zād ped nēm-nēzag *drahnāy, ud tō-iz az abārīg frazendān dosttar.
49. u-t az pus dā brād si-vīst murd bavend.”
50. pas Vištāsp šāh ka-š hān soxan ašnūd, az farroxān *gāh ō zamīg ōbast.
51. u-š ped hōy dast kārd ud ped dašn dast šamšēr gīred, ud tag ō Jāmāsp kuned ud gōbed kū: “mā drust avar *sambastār ī jādūg, cē tō mād jādūg, u-t pid drōzan būd!
52. u-t hān <ī> guft nē baved, bē ka-m ped xvarrah ī Ohrmazd bay ud dēn ī māzdesnān ud gyān ī Zarēr ī brād sōgand <nē> xvard *hē, ēg-um ped ēn do-tēx šamšēr <ud> kārd sar brīd <ud> bē <ō> zamīg abgand hē.
53. pas Jāmāsp <ī bidaxš> gōbed kū: “agar ašmā bayān sahed, az ēn xāk abar āxēzed ud abāz ō kay-gāh nišīyed, cē *šāyed-būd šāyed būdan [*kū, ēn ī man guft, baved.]”
54. Vištāsp šāh nē abar āxēzed ud nē abāz nigered.
55. pas hān tahm spāhbed <ī> nēv Zarēr kē šaved <ud> gōbed kū: “agar ašmā bayān sahed, az ēn xāk abar āxēzed ud abāz ō kay-gāh nišīyed, cē an fradāg <rōz> šavam ud abāg hān ī xvēš zāvar hyōn pāzdah bēvar ōzanam.”
56. Vištāsp šāh nē <abar> āxēzed <ud> nē abāz nigered.
57. pas hān Pādusrū ī ardāy <ī> māzdesnān kē šaved ud gōbed kū: “agar ašmā bayān sahed, az ēn xāk abar āxēzed ud abāz ō kay-gāh nišīyed, cē an fradāg rōz šavam ud ōzanam abāg hān ī xvēš zāvar hyōn cahārdah bēvar.”
58. Vištāsp šāh nē abar āxēzed <ud> nē abāz nigered.
59. pas hān Frašāvard ī Vištāsp šāh pus kē šaved <ud> gōbed kū: “agar ašmā bayān sahed, az ēn xāk abar āxēzed ud abāz ō kay-gāh nišīyed, cē <an> fradāg rōz šavam ud ōzanam abāg hān ī xvēš zāvar hyōn sizdah bēvar.”
60. Vištāsp šāh nē <abar> āxēzed ud nē abāz nigered.
61. pas hān yal ī nēv Spendyād kē šaved ud gōbed kū: “agar ašmā bayān sahed, az ēn xāk <abar> āxēzed <ud> abāz ō kay-gāh nišīyed, cē an fradāg rōz šavam, *ped xvarrah ī Ohrmazd ud dēn ī māzdesnān ud gyān ī ašmā bayān sōgand xvaram kū zīndag hyōn ēc bē nē hilam az hān razm.”
62. pas Vištāsp šāh abar āxēzed ud abāz ō kay-gāh nišīyed, ud Jāmāsp ī bidaxš ō pēš xvāhed ud gōbed kū: “*mā bād ēdōn ceōn tū Jāmāsp gōbē, cē an diz-ē ī rōyēn bē framāyem kirdan, ud hān diz darbann hān ī āhenēn bē framāyem kirdan, avēšān pusarān ud brādarān ud vispuhrān andar hān diz framāyem nišastan, šāyed kū ō dast <ī> dušmenān nē rasend.”
63. <pas> gōbed Jāmāsp <ī> bidaxš kū: “agar diz-ē ī rōyēn bē framāyē kirdan, *anīz darbann āhenēn bē framāyē kirdan, avēšan pusarān ud brādarān <ud> vispuhragān ī tō, rāmšahr kay Vištāsp šāh, andar hān diz bē framāyē nišastan, pas hān and dušmen az šahr abāz dāšt kē tuvān?
64. cē hān ī tahm spāhbed ī nēv Zarēr ī tō brād, kē šaved <ud> ōzaned hyōn pāzdah bēvar? ud hān ī Pādusrū ī ardāy <ī> māzdesnān, kē šaved ud ōzaned hyōn cahārdah bēvar? ud hān ī Frašāvard ī tō pus, kē šaved ud ōzaned hyōn sizdah bēvar?”
65. Vištāsp šāh gōbed <kū>: “nūn cand āyend hyōn az bunag, ud ka *ēvbār āyend cand mīrend ud cand abāz šavend?”
66. gōbed Jāmāsp <ī> bidaxš kū: “sad-u-sī-u-ēk bēvar hyōn az bunag bē āyend, ka ēvbār āyend ēc zīndag abāz bē nē šavend, bē hān ī ēk Arzāsp ī hyōnān xvadāy.
67. ōy-iz yal Spendyād gīred, u-š dast-ē ud pāy-ē ud gōš-ē brīned, u-š cašm-ē ped ātaš dazed, u-š ped brīddumb xar-ē abāz ō šahr ī xvēš frested, ud gōbed kū: ‘šav ud gōb kū-<t> cē dīd az dast ī man, yal Spendyād!’”
68. ud pas gōbed kay Vištāsp šāh kū: “agar hamāg pus ud brād ud vispuhragān ī man kay Vištāsp šāh ud hān-z ī Hutōs ī-m xvah ud zan, kē az pus dā duxt sīh aziš zād ēsted hamāg murd bavend, ēg-im ēn abēzag dēn ī māzdesn<ān> ceōn-im az Ohrmazd pedīrift, bē nē hilem.”
69. pas Vištāsp šāh ō kōf sar nišīyed, zāvar abāg dvāzdah dvāzdah bēvar. Arzāsp-iz ī hyōnān xvadāy ō kōf sar nišīyed, u-š zāvar būd dvāzdah bēvar bēvar.
70. ud hān tahm spāhbed ī nēv Zarēr kārezār aōn nēv kuned ceōn ka Ādur yazd andar ō nayestān ōfted, u-š Vād-iz ayyār baved; ka šamšēr frāz zaned, dah ud ka abāz vēzed, dah-ē hyōn ōzaned; ka gušnag <ud> tišnag baved, xūn <ī> hyōn vēned <ud> šād baved.
71. ud pas Arzāsp ī hyōnān xvadāy az kōf sar nigāh kuned ud gōbed kū: “az ašmā hyōnān kē ast kē šaved <ud> abāg Zarēr kuxšed, u-š kušed hān tahm spāhbed ī nēv Zarēr, dā Zarrǝstan ī man duxt ped zanīh aviš daham, kē andar hamāg šahr <ī> hyōnān zan-ē az ōy huzihrdar nēst.
72. u-š hamāg šahr ī hyōnān bidaxš kunam, cē agar dā šab *zīvād Zarēr, ēg nē dagr-zamān baved ka az amā hyōnān ēc zīndag abāz bē nē pāyed.”
73. pas hān ī Vīdrafš ī jādūg abar ō *pāy ēstād <ud> gōbed kū: “man rāy asp zēn sāzed dā an šavam.”
74. ud asp zēn sāzend, u-š Vīdrafš ī jādūg abar nišīyed, ud stāned hān frašn ī afsūdag ī dēvān andar dušox ped xēšm ud zahr distag, <ud> ped āb ī bazag kird ēstād, frāz ō dast stāned ud andar razm dvāred. vēned kū Zarēr kārezār ceōn nēv kuned, frāz ō pēš nē ayāred *šudan.
75. u-š az nihān, az pas frāz dvāred, šaved ud Zarēr azēr ī kamarbann ud azabar ī kustīg ped pušt bē zaned ud ped dil bē vidāred ud bē ō zamīg abganed ud pas bē nišīyed hān parrišn ī kamānān ud vāng ī nēv mardān.
76. pas Vištāsp šāh az kōf sar nigāh kuned ud gōbed ku: “*az ped *ēd dāram kū-mān ōzad Zarēr ī ērān-spāhbed, cē nūn nē āyed parrišn ī kamānān ud vāng <ī> nēv mardān.
77. bē az ašmā ērān kē ast kē šaved ud Zarērān kēn xvāhed, dā ka-š hān *Humāy ī man duxt ped zanīh aviš daham, kē andar hamāg šahr ī ērān zan az ōy huzihrdar nēst.
78. u-š mān <ud> kadag ī Zarēr <ud> spāhbedīh ī ērān aviš daham.”
79. ēc ēr ud āzād pesox nē dād, bē hān pus <ī> Zarērān, kōdak haft-sālag humānāg, frāz ō pāy ēstād ud gōbed kū: “man rāy asp zēn sāzed dā an šavam ud razm <ī> ērān vēnam, *vāspuhr ī Vištāspān vēnam, ud hān ī tahm spāhbed ī nēv Zarēr ī man pidar, agar zīndag agar murdag, ceōn ast pēš <ī> ašmā bayān gōbam.”
80. pas Vištāsp šāh gōbed kū: “tū mā šav! cē tū aburnāy hē ud razm ud pahrēz nē *dānē, u-t angust ped tigr nē xvast ēsted.
81. mā hyōn rasānd ud tō ōzanānd, cē-šān Zarēr-iz ōzad, pas hyōn do nām barend kū: ‘-mān ōzad Zarēr ī ērān-spāhbed, u-mān *ōzad Bastvar ī-š pus.’”
82. pas Bastvar ped nihān ō ōy <ī> āxvarr-sālār gōbed kū: “Vištāsp <šāh> framān dād kū hān asp ka Zarēr kōdak būd <abar nišast> bē ō Bastvar dahed.”
83. ōy ī āxvarr-sālār asp zēn framāyed kirdan, ud Bastvar abar nišīyed ud asp frāz hiled, ud dušmen ōzaned dā ō hān gyāg rased kū murdag nēv pidar vēned.
84. ud nē dagr-zamān pāyed, gōbed kū:
“alā šarγ ī *gyān-appar! cang-it kē āmušt?
alā varāz pid! raxv ī tō kē āmušt?
alā *Sēn-murvag! bālag-it kē āmušt?”
85. ka-t hamē ēdōn kāmist *kū abāg hyōnān kārezār kunē, nūn ōzad abgand hē andar im razm ceōn a-gāh <ud> a-ganz mardōm.
86. u-t ēn xvahl vars ud rēš vādān višuft ēsted; u-t abēzag tan aspān xvast ped pāy; u-t xāk ō grīv nišast; bē nūn ceōn kunam? cē agar az asp bē nišīyam ud tō pidar sar andar kanār gīram, u-t xāk az grīv bē gīram, pas sabukīhā abāz ō asp nišastan<-am> nē tuvān.
87. mā hyōn rasānd ud man ōzanānd, cē-šān tū-iz kušt <hē>, pas hyōn do nām barend kū: “-mān ōzad Zarēr <ī> ērān-spāhbed, u-mān ōzad Bastvar ī-š pus.”
88. pas Bastvar asp frāz hiled ud dušmen *ōzaned dā ō pēš <ī> Vištāsp šāh rased, gōbed kū: “an šud ham, u-m razm <ī> ērān drust dīd, ud vāspuhr ī Vištāspān.
89. u-m murdag dīd hān tahm spāhbed ī nēv Zarēr ī man pidar, bē agar ašmā bayān sahed, man hiled dā šavam ud pidarān kēn xvāham.”
90. pas gōbed Jāmāsp <ī> bidaxš kū: “hiled ēd rahīg, cē-š abar baxt ēsted dušmen ōzaned.”
91. ud pas Vištāsp šāh asp zēn framāyed kirdan.
92. *ud Bastvar abar *nišāyed, <ud> az kantigr ī xvēš tigr-ē dahed, u-š āfrīn pediš kuned, gōbed kū:
“*nūn tigr az man šavāy,
pērōz *avar āyāy,
ped harv razm ud pādrazm
tū pērōz vindāy,
pādrōz nām āvarāy,
jāyēdān rōzān dušmen murd āvarāy.
93. ud nūn bārag ud drafš,
im spāh <ī> ērān
kār-am tū *framāyāy.
nāmāvurd bavāy
yad ō rōz jāyēd.”
94. pas Bastvar asp frāz hiled ud dušmen ōzaned ud kārezār aōn nēv kuned ceōn Zarēr <ī> ērān-spāhbed kird.
95. pas Arzāsp <ī> hyōnān xvadāy az kōf sar nigāh kuned ud gōbed kū: “hān kē ast, hān dah-sālag rahīg, kē gurdvār asp dāred ud gurdvār zēn dāred <ud> kārezār aōn nēv kuned ceōn Zarēr <ī> ērān-spāhbed kird?
96. bē *az ped ēd dārum kū hān az tōhmag <ī> Vištāspān, <ud> Zarērān kēn xvāhed.
97. bē <az> ašmā hyōnān kē ast kē šaved ud abāg hān rahīg kuxšed, ēg-iš hān Behǝstan ī man duxt ped zanīh bē daham, kē andar hamāg šahr ī hyōnān zan az ōy huzihrdar nēst.
98. u-š andar hamāg šahr ī hyōnān bidaxš kunem, cē agar dā šab *zīvād rahīg, ēg nē dagr-zamān baved ka az amā hyōnān ēc zīndag abāz <bē> nē māned.
99. pas Vīdrafš <ī> jādūg abar ō pāy ēstād, u-š guft kū: “man rāy asp zēn sāzed dā an šavam.”
100. ud *syāh-āhenēn-sumb ī Zarēr bārag zēn sāzend, ud Vīdrafš <ī> jādūg abar *nišīyed ud stāned hān *frašn ī afsūdag <ī> dēvān andar dušox ped xēšm ud zahr distag <ud> ped āb <ī> bazag kird ēstād, frāz ō dast stāned ud andar razm dvāred, vēned kū Bastvar kārezār ceōn nēv kuned, frāz ō pēš nē ayāred šudan, ped nihān az pas frāz šaved.
101. Bastvar nigāh kuned ud *gōbed kū: “durvand ī jādūg, frāz ō pēš avar! cē an dāram bārag azēr <ī> rān, bē tāxtan nē dānam, ud an dāram tigr andar kantigr, bē vistan nē dānam. frāz ō pēš avar, u-t ēn xvaš gyān appār kunam, ceōn-t hān <ī> tahm spāhbed <ī nēv>, Zarēr <ī> man pidar kird.
102. ud Vīdrafš <ī> jādūg vistāx *baved <ud> frāz ō pēš šaved; ud hān syāh-āhenēn-sumb ī Zarēr bārag, ka vāng ī Bastvar ašnaved, cahārbāy abar zamīg *ēsted, nōh-sad-u-navad-u-nōh vāng bē kuned.
103. ud Vīdrafš frašn vēzed ud Bastvar ped dast frāz pedīred.
104. pas ruvān ī Zarēr vāng kuned kū: “ēd *frašn az dast bē abgan ud az kantigr ī xvēš tigr-ē stān <ud> ēd durvand pesox kun!”
105. ud Bastvar *frašn az dast bē abganed, ud az kantigr ī xvēš tigr-ē stāned ud Vīdrafš ped dil zaned <ud> ped pušt bē vidāred, ud bē ō zamīg abganed ud drūd ō ruvān <ī Zarēr> dahed.
106. u-š bē *hanzed hān mōg ī spēd ī ped murvārīd, *ud ham zarr Zarēr brahmag, *ud xvad abar bārag ī Zarēr nišīyed, ud bārag-iz <ī> xvēš ped dast frāz pedīred, ud asp frāz hiled ud dušmen ōzaned, dā ō hān gyāg rased kū Grāmīkkird <ī> Jāmāsp pus drafš ī pērōzān ped dandān dāred ud ped dō dast kārezār kuned.
107. Grāmīkkird ud hān vazurg spāh <ī Ērānšahr> ka Bastvar vēnend, hāmōyēn Zarēr rāy brāmend ud gōbend kū: “avar cim āmad hē ka-t angust ped tigr nē xvast ēsted ud razm ud pahrēz nē dānē?
108. mā hyōn rasānd ud tō ōzanānd, cē-šān Zarēr-iz ōzad, pas <hyōn> do nām barend kū: ‘-mān ōzad Zarēr <ī> *ērān-spāhbed, u-mān ōzad Bastvar ī-š pus.’”
109. pas Bastvar gōbed kū: “ped pērōzīh dārāy tū Grāmīkkird <ī> Jāmāsp pus ēd drafš <ī> pērōzān, cē agar zīndag rasam ō pēš ī Vištāsp šāh, gōbam kū-t kārezār cōn nēv kird.”
110. pas Bastvar asp frāz hiled <ud> dušmen ōzaned dā ō hān gyāg rased kū yal <ī> nēv Spendyād <kārezār kuned.>
111. <Spendyād> ka Bastvar vēned, hān ī vazurg spāh ī Ērān<šahr> ped Bastvar bē hiled <ud> xvad ō kōf sar šaved, ud Arzāsp abāg dvāzdah bēvar spāh az kōf sar zaned ud bē ō dašt abganed, ud Spendyād *zaned ud ō Grāmīkkird spōzed, <ud> Grāmīkkird zaned ud ō Bastvar spōzed.
112. ēg nē dagr-zamān baved ka az avēšān hyōnān ēc zīndag abāz bē nē māned, bē hān ī ēk Arzāsp ī hyōnān xvadāy.
113. ud ōy-iz yal Spendyād gīred, u-š dast-ē ud pāy<-ē> ud gōš-ē brīned, u-š cašm-ē ped ātaš sōzed, u-š ped brīdag-dumb xar-ē abāz <ō> šahr ī xvēš frested.
114. gōbed kū: “šav ud gōb kū-t cē dīd az dast <ī> man, yal Spendyād! kū, *hyōnān-z dānend kū cē būd ped rōz <ī> fravardīn andar azdahāg razm <ī> Vištāspān.”
Col.:
1.frazaft ped drūd, šādīh ud rāmišn. vahišt-bahr bavād Vištāsp puhr ī Luhrāsp, anīz Zarēr, Bastvar ud Spendyād, ped ham ēvēn Frašāvard ī Jāmāspān (×Vištāspān) ud Grāmīkkird puhr <ī> Jāmāsp, Bādusrū ud Pādsasan kē xvad burd-nām hend.
2. harvīn vāspuhragān, gavān, ēraxtārān gāh-iš<ān> farrox bavād, ped vahišt <ī> bāmīg, ped asar-rōšnīh, nišēm <ī> varzāvandān.
3. harvīn abzōn bavād! kū ruvān anōšag bavād! kū Dēnpanāh nibišt ēd, šād, pērōz bavād, šādān z<īv>ād, puhr <ī> šādān dārād.
4. farrox bavād dā hazārān sālān, yad ō rōz <ī> fraškird, ābād mān mēhan, harv xīr abzōn bavād!
5. kū-tān xvad bē *varmed zīr, kē xvāned farrox nibēg ped anōšāyādīh ī Rustahm Mihrābān nām āyādēned kē-š peccēn nibištag būd; man dēn bannag mihrābān kayhusrō nibišt.
6. kē xvāned amā ped nēkīh nām āyādēned ped tan-drustīh ped im gētīg, ābād ped vidardān ī tan <ped> nišēm <ī> varzāvandān. u-m aburnāy az dēnīg frazendān būd-am nibištār, andar im gētīg āzād vehān pērōz bavāy, vattar *pazdām.
7. pērōz ud pērōzag bavād dādār Ohrmazd, namāz <ō> Zardušt ī Spitāmān kē āvurd dēn ī veh māzdesnān abēzag ruvāg <kird> ped ayyārīh ī Vištāsp šāh ud Zarēr ud Spendyād.
Made with Bullet